Онлайн семинар өз мәресіне жетті

Қазақстан Республикасы Мәдениет және спорт министрлігінің ONLINEda bol жобасы аясында Тіл саясаты комитеті, Шайсұлтан Шаяхметов атындағы «Тіл-Қазына» ұлттық ғылыми-практикалық орталығы ұйымдастырған «ТӘЖІРИБЕ АЛАҢЫ: ТІЛ, ӘДІСТЕМЕ, НӘТИЖЕ» тақырыбында халықаралық онлайн семинарының соңғы күнінде екі шетелдік маман тілді оқытудағы өз тәжірибелерімен бөлісті.
Башқұрт мемлекеттік университеті Шет тілдері кафедрасының аға оқытушысы Римма Флюровна Мингазетдинова «Ағылшын тілінен қосымша білім беру бағдарламаларын жүзеге асыруда қолданылатын коммуникативтік дағдыларды дамытудың тиімді әдістері (Intermediate, Upper- Intermediate, Advanced деңгейлері бойынша) деп аталатын баяндамасында ағылшын тілін үйрету тәжірибесімен бөлісті. Интерактивті әдіс-тәсілдерді санамалап, ең тиімді деген, жақсы нәтиже беретін түрлеріне тоқталды. Оқытушы тілді үйретуде тыңдалымға ерекше мән беру қажеттілігіне оқытушылардың назарын аударды. Тілді үйренуде аудиохабарлама, қысқаметражды бейнефильмдерді көрудің пайдасы, күнделікті қайталау, тіл үйренушілердің өздеріне ұнайтын ақпараттарын оқыту, сөйлеуге арналған интернет ресурстарын пайдалану және тағы басқа көптеген жаңашыл идеяларымен бөлісті.
Семинарда Түркияның Анкара қаласындағы Гази университетінің «Tömer» тілді үйрету орталығының директоры, профессор Незир Темур «Тіл үйретудің негізгі принциптері» тақырыбында баяндама жасады. Профессор өз презентациясы аясында мәселені «Нені үйрету, қалай үйрету, қашан үйрету?» деген қарапайым сұрақтардан басталатынын айта отырып, кез келген заттың, адамның  өз табиғаты болатыны сияқты тілдің өз табиғаты болады, барлық сұраққа жауапты осы тілдің өз табиғаты аясынан іздеу керек деген пікірін білдірді. Ал тілдің өзі тілдегі дыбыстардан, семантикалық мағына мен тілдік құрылымнан тұратынын, сондай-ақ грамматика мен семантиканы бірге қарастыруымыз керек деп атап көрсетті. Профессор тіл үйретудің қарым-қатынас, орта, мәдениет, салыстыру, әмбебаптылық деген параметрлерін талдай келе, халықаралық конференцияларда ең жиі қойылатын сұрақтардың бірі «Тіл үйретуде лексика мен грамматиканың қайсысына көбірек мән беруіміз керек?» деген сұрақтың шешімін былайша топшылады: «Мен, мәселен, Қазақстанда болсам, тіл білмесем, қазақша білетін сөздерімді айтам, сөздік қорым арқылы қарым-қатынасқа түсемін, мені тыңдап тұрсаңыз сіз грамматикаңызды дұрыстап айтыңыз деп тұрмайсыз, сол айтқан сөздеріммен түсінуге тырысасыз. Бұдан грамматиканың емес, сөздік қордың маңыздырақ екенін көреміз».
Тәжірибелі тіл маманы шынайы оқыту моделін құру арқылы тілді үйретудің тиімділігіне назар аудартты. Тілді оқыту барысындағы дұрыс құрылған стратегия, оқытушы мен тіл үйренушінің психологиялық дайындығы,   жүйелі сабақ, дұрыс таңдалған әдістеме оң нәтижеге жеткізетінін  баса айтты.
Қатысушылар тілді оқыту мәселесі бойынша көкейлерінде жүрген сұрақтарын қойып, оған толық жауап алды.
Семинарға қатысушылар спикерлердің әдістемелік тәжірибелеріне тәнті болып, семинар барысында өз ризашылықтарын білдіріп жатты.
Семинарға  Zoom сервисі бойынша 300 оқытушы қатысты. Фейсбук  желісіндегі «ONLINEda bol» парақшасы арқылы 1 сағат ішінде 150 маман тыңдап үлгерді.
Сөйтіп, халықаралық семинар өз мәресіне жетті.
Жабылу салтанатында Ш. Шаяхметов атындағы «Тіл-Қазына» ұлттық ғылыми-практикалық орталығының Бас директоры Әлібек Асқар қорытынды сөз сөйлеп, баяндама жасаған шетелдік және қазақстандық әріптестерімізге   ризашылығын білдіріп, алғысхаттар мен қатысушыларға онлайн сертификаттар табыстады.

Басып шығару