18 май 13:41korilim:836 Sayasat

А. Мамин: «Самұрық-Қазына» қоры ірі жобаларға инвестиция салуға назар аударуы тиіс

ҚР Премьер-Министрі Асқар Маминнің төрағалығымен өткен Инвестициялық штаб отырысында 2021 жылғы қаңтар-сәуірдегі инвестицияларды тарту бойынша атқарылған жұмыстың қорытынды көрсеткіштері қаралды. Бұл туралы primeminister.kz сайты хабарлады.

Ұлттық экономика министрі Әсет Ерғалиев осы жылдың 4 айында тау-кен өндірісі өнеркәсібін есепке қоспағанда, негізгі капиталға салынған инвестициялар көлемі 32,3% деңгейінде өсім көрсеткенін айтты. Министр ҚР экономикасының қалпына келу траекториясына шығуы аясында осы жылдың 4 айының нәтижелері бойынша негізгі капиталға салынған инвестициялар өсімінің жоғары қарқыны өңдеу өнеркәсібінде (112,8%), ауыл шаруашылығында (66,1%) және құрылыста (72,4%) байқалғанын атап өтті. Ұлттық экономиканы қалпына келтірудің маңызды факторларының бірі қызмет көрсету секторындағы көрсеткіштер болды.

Биылғы қаңтар-сәуір айларының нәтижелері бойынша соңғы 12 айда алғаш рет көрсетілетін қызметтер секторындағы өсу қарқыны оң динамика көрсетті. Көрсетілген динамика аясында негізгі капиталға салынған инвестициялар ағынының жоғары қарқыны сауда (28,3%), көлік және қоймалау (27,6%), қаржы және сақтандыру қызметі (28,6%), жылжымайтын мүлік операциялары (27,5%), білім беру (10,3%), өнер, ойын-сауық және демалыс (30,9%), сондай-ақ ақпарат және байланыс (61,2%) секілді салаларда байқалды.

Отырыста «Самұрық-Қазына» АҚ инвестициялық жобаларының пулы қаралды. «Самұрық-Қазына» АҚ басқарма төрағасы Алмасадам Сәтқалиев 31.12.2020 жылғы жағдай бойынша «Самұрық-Қазына» АҚ инвестициялық портфелі серіктестердің үлестерін ескере отырып, құны 73 трлн теңге болатын 203 жобадан тұратынын атап өтті.

«Жоспарланған инвестициялық жобаларды іске асыру және инвестиция тарту көлемін одан әрі арттыру үшін түбегейлі шаралар қабылдау қажет. "Самұрық-Қазына" қоры энергетика, мұнай-газ химиясы, көлік және логистика және басқа да стратегиялық салалардағы ірі жобаларға инвестиция салуға назар аударуы тиіс, бұл экономиканың дамуына мультипликативті әсерін тигізеді», — деді А. Мамин.

Сурет: aigak.kz

Басып шығару