Алпауыт British Petroleum компаниясы мұнай мен газдан неге бас тартты?

Жер жүзіндегі мұнай мен газ өндірісіне ықпал етуге қауқарлы  British Petroleum компаниясы 2030 жылға қарай өндіріс көлемінің жартысын қысқартып, үнемделген қаражатты энергетика саласына салуға мүдделі. Өздерінің бұл ниетін ауаға қажетсіз қалдықтарын жібермейтін саланың басын ұстауды көздейтінімен түсіндіріпті. 
Британиялық компанияның 2030 жылға дейінгі даму жоспарында мұнай мен газ өндірісін 40 пайызға қысқартып, кемінде миллиард доллар қаражатты энергетикаға салу туралы нақты бөлім бар. 
Компанияның ресми мәліметіне сүйенсек, көмірқышқыл газын аз бөлетін салаға 2030 жылға қарай 5 миллиард доллар инвестиция салу жоспарланыпты. Осылайша, кәрі құрлықтағы «қадірлі компания» сатылы түрде жер асты байлығының сарқыншағынан бас тартып, энергетиканы пайда көзіне айналдыруды мақсат тұтып отыр. Ең қызығы, дәл осы мәлімдемеден кейін  British Petroleum компаниясының акциясы 8 пайызға өскен. 
Компанияның болжамынша, Жердегі температураның көтерілуі 1,5 градус деңгейінде шектелсе, жер асты байлықтарына деген сұраныс 75 пайызға төмендейді. Егер жаһандық жылыну 1,5 градустан төмен болса, сұраныс 50 пайызға азаймақ. Компания осындай жағдай орын алса, жер бетіндегі мұнай мен газ өндірісі күніне миллион баррельге дейін азаюы ықтимал екенін алға тартыпты. Дегенмен, British Petroleum алдағы бес жыл көлемінде негізгі күшті мұнай мен газ өндіруге жұмсайтынын жеткізді. 
Компания жаңа мұнай кеніштерін табу үшін цифрлы технологияларды дамытуға 25 миллиард доллар жұмсауға бейіл екенін және инфраструктурасы қалыптасқан кеніштерді пайдалануды көздейтінін мәлімдеген. Осы бағыттағы жұмыс арқылы олар жаңа салаға салатын инвестицияға қаражат үнемдемек. 
2030 жылға дейін алпауыт компания биоотын мен сутегі тасымалдау қызметіне де назар аудармақ. 2030 жылға дейін экологиялық бизнеске салынатын қаражат компания табысының үштен бір бөлігіне дейін жетуі мүмкін.
Мұнай сарқыла бастаған сайын майлы жіліктің басын ұстағандар да шегіне бастады. Қазба байлығына тәуелді, әсіресе мұнай мен газдың табысымен күнелтіп отырған мемлекеттердің күні не болмақ?! Басып шығару