Ө.Шөкеев: Айқайларыңыз ештеңе шешпейді (видео)

  • 08 май, 09:22
  • Көрілім: 1 078

Өзбекстандағы Сардоба су қоймасы жарылып, Түркістан облысындағы он бірдей ауылды су шайып кетті. Қазір апатты жағдайдағы ауыл тұрғындары жедел штаб құрған орындарда отыр. олар өздерінің үйлері мен кәсіптерін уайымдайды.  

Апатты жағдай орын алған күннен бері Мақтаарал ауданының тұрғындары үшін еліміздің түкпір-түкпірінен кәсіпкерлер, өнер жұлдыздары, қарапайым қоғам белсенділері бастаған көмек керуендері Түркістан облысын бетке алып ағылуда. Олар зардап шеккен халыққа киім-кешек, қажет заттар мен азық-түліктер апарып беріп жатыр. 

Әлеуметтік желіде су басқан ауыл тұрғындары әкімнің келмегенін айтып шырылдап жатқан-ды. Бүгін Түркістан облысының әкімі Өмірзақ Шөкеев пен премьер-министрдің орынбасары Роман Скляр халықпен кездесіп, жоспарларымен бөлісті. 

«Өзбекстандағы платинадан 500 миллион куб метр су кеткен. Біздің ауылдарды ғана емес, Өзбекстанның жалпы саны 70 мың адам тұратын бірнеше қышлағын су басып қалды. Сіздер ештеңені уайымдамаңыздар. Біз Арыс қаласында 7000 үйді екі ай ішінде қалпына келтірдік. Оның жанында 1000 үйді қалпына келтіру қиынға соға қоймас. Мүлік, мал, егін, бәрінің шығынын өтеп береміз. Өзбекстан тарапынан техника келіп жатыр. Біз ағайын халықпыз. Олар да әдейі жасамаған болар. Тек сіздер сабыр етіңіздер, біз бәрін істеп береміз», - деді облыс әкімі. 
Жиналған жұрт мемлекет басшысы мен әкімге, көмек қолын созып жатқан барша ағайынға алғыс білдірді. 

«Саламатсыздар ма! Біз қазір осы жерде арнайы комиссия құрып, барлық мәселелерді жоспарлап отырмыз. Өмірзақ Естайұлымен бірге Өзбекстанда да болдық. Мемлекет басшысы айтқандай, ешкім көмексіз қалмайды», - деді Роман Скляр қазақшалап. 
Сондай-ақ, аймақ басшысы халықты арандатушыларға еріп, жұмыс істеуге бөгет болмауға шақырды. 

«Арандатушыларға ермеңіздер. Міне, әр облыстан түрлі көмек келіп жатыр. Үкіметпен бірігіп, бәрін жасаймыз. Тек сабыр керек. Сабыр сақтаңыздар, барлық шығын өтеледі. Сіздер арандатушыларға еріп қанша айқайласаңыздар да, ол ештеңе шешпейді. Бірігіп жұмыс істеуіміз керек», - деді Өмірзақ Шөкеев. 

Сондай-ақ оқыңыз

Пікір қалдыру