Шығыс Қазақстан облысының әкімі Даниал Ахметовтың видеоүндеуі әлеуметтік желілерде белсенді тарап жатыр.
Оған себеп соңғы үш-төрт күннің бағдарында "Күршім сатылып кетіпті. Қытайлар жалға алып қойыпты. Аудан көшіп жатыр екен" деген ДАҚПЫРТ.
Әлеуметтік желідегі ДАҚПЫР-та ер-әйелдердің дауысымен қарапайым жұртқа барынша сенімді сөйлеп жатты. Әрине, қарсы ақпарат таратып, теріске шығарған аудиолар да болды. Біз кәнігі ақпаратшы ретінде оған мән бере қойғанымыз жоқ. Себебі, шекараның дәл түбіндегі Күршімді аудан бойынша сатып жіберуге ешқандай әкімнің де, сенатордың да дәті бара қоймас, сайлау кезіндегі әдейі шығарылған сойқан ғой дегенбіз.
Кешелі-бүгін облыс басшысы Даниал Ахметовтың видео жариялап ешқандай жердің сатылмағанын, сатылмайтынын және жалға да берілмейтінін айтқаны жөн болды дедік.
Біздің әкім мораториядан бұрын 15 мыңдай гектар жер жат елге берілгені жайлы бірер факті келтіре кетті. Естуімізше Бесқарағайдың жерін ҚЫТАЙЛАР алыпты.
Хош дейік, осыдан сәл бұрын САЙЛАУ науқанымен бірге тағы бір СОЙҚАН xабар тараған.
Сайлау науқаны басталып үгіт-насихат қызып жатқан шақта "Шығыс Қазақстанда Қытаймен бірлескен тауық фермасы салынады екен. Ол фермаға 40 мың гектар жер беріледі екен" дегенді. Шығыстағы салиқалы сайттардың бірінен көргенбіз. Бұның да анық-қанығына бармағасын үнсіз қалғанбыз.
Дегенмен Даниалдың 2018 жылы Үрімшіге барып, ондағы қазақтар мен ұйғырларға тізесін батырып жатқан Чың Чанго деген провинция хатшысымен қол алысып тұрған суреттерін көргенбіз.
Көрші ел болғасын аймақ басшылары кездесіп, шекаралық сауда қарым-қатынас мәселесін талқылап жатқан шығар. Үлкен саясатпен шаруасы жоқ кіші басшылар ғой деп, ол жақтағы қазақтар туралы ештеңе демегенін елемегенбіз.
Ал, сайлау НАУҚАНЫМЕН тауықтың шақырған дауысы – "Тауық фермасы + 40 мың гектар жер» туралы ақпаратты көргенде көңілімізге күдік туған.
Осы жолы Даниал үш-төрт күндегі WhatsApp меccенджерінде тараған жалған ақпарат туралы айтты. Ал, жаңағы тауыққа беретін 40 мың гектар жер жайлы СОЙҚАН-ды теріске шығарған жоқ.
Соған қарағанда науқан мен жер дауына байланысты сойқан қатар кете беретін сияқты.
Науқанды қоя тұрып, жер дауына араласамыз-ау шамасы.
«Байрағыңды» тік ұста!
Сілетемені қараңыз: https://altaynews.kz/kz/40-myin-gektar-zher-bolemiz-shko-da-tagyi-bir-kus-fabrikasyi-salyinuyi-mumkin-37580.html Басып шығару