Жираф пен зебра атып жүр: Экология министрлігі аңшыларға қатысты мәлімдеме жасады

Қазақстан экология, геология және табиғи ресурстар министрлігінің баспасөз хатшысы Самал Ибраева Африкада жираф пен зебра атқан аңшылардың әрекетіне қатысты аікір білдірді. Оның айтуынша, саваннадағы «аң» аулағандардың бейнежазбасы қоғамда кең резонанс тудырды. Бұл бекер емес. Қазіргі күні көпшілік қызық үшін аңға шығуды дұрыс деп санамайды. 

«Ежелгі заманнан бері адамдар тірі қалу үшін, отбасын асырау қажет болғанда жануарларды ауланған. Бірақ біз видеода көрген аңшылық немесе басқаша айтқанда ойын-сауық үшін өлтіру есі дұрыс адамдарда әрқашан тиісті реакция, яғни жиіркеніш пен жағымсыз сезімдер тудырады және тудыра береді. Бізге және біздің балаларымызға қатыгездікті насихаттау қажет емес. Былтыр Президент Каспийдегі итбалықтарды ұрып-соғуға қатысты сыни баға берді. Сондықтан еліміздің ең жоғары деңгейінде барлық тіршілік иелеріне негізсіз қатыгездік айыпталса, онда бұл барлығына назар аударуға сигнал», - деп жазды Самал Ибраева.

Самал Ибраева ашкөздік және қатігездік жануарлар мен өсімдіктер санының азаюына әкелетінін айтты. 

«Дүниежүзілік табиғат қорының (WWF) "Тірі планета" есебіне сәйкес, 1970-2014 жылдар аралығында жер бетінде жабайы жануарлар - сүтқоректілер, құстар, бауырмен жорғалаушылар, қосмекенділер саны 60 пайызға азайған. Жануарлар санының азаюына негізгі себептердің бірі - аңшылық. Адамның іс-әрекетінен табиғатта жануарлардың жаппай қырылу процесі басталды. 

Ғалымдар биологиялық түрлердің жойылу қарқыны эволюциялық табиғи көрсеткіштен 100 есе жоғары екенін есептеді. Осыған байланысты көптеген мемлекет пен мемлекеттік емес құрылым жойылып бара жатқан түрлерді құтқарумен айналысады. Соның ішінде Халықаралық Қызыл кітап көмегімен», - деді Қазақстан экология, геология және табиғи ресурстар министрлігінің баспасөз хатшысы.