Қазақстан қылмыс өршіп тұрған 50 елдің қатарына кірді

Қазақстан қылмыс өршіп тұрған 50 елдің қатарына кірді, - деп хабарлайды Tengrinews.kz Ranking.kz сайтына сілтеме жасап.

Numbeo порталының мәліметі бойынша, Қазақстан 2022 жылдың бірінші жартыжылдығында қылмыс деңгейі бойынша 142 ел рейтингінде 47-орынға шыққан. Орын неғұрлым жоғары болса, елдегі қылмыс мәселесі соғұрлым нашар. Қылмыс деңгейі бойынша елдердің рейтингі кейінгі 36 айдағы деректерді пайдалана отырып, жылына екі рет жасалады.

Еліміздегі қылмыс деңгейі қылмыс индексін бағалау негізінде есептеледі. 0-ден 19,99-ға дейінгі көрсеткіш қылмыс деңгейі өте төмен, 20-дан 39,99-ға дейін - төмен, 40-тан 59,99-ға дейін - орташа, 60-тан 79,99-ға дейін - жоғары, 80 және одан жоғары - өте жоғары. 2022 жылдың бірінші жартысында антилидер 83,16 және 80,26 индекстерімен Венесуэла мен Папуа-Жаңа Гвинея болған, бұл қылмыстың өте жоғары деңгейін көрсетеді. Одан кейін Ауғанстан (78,19 индексімен 3-орын), Оңтүстік Африка (75,37 индексімен 4-орын) және Гондурас (74,66 индексімен 5-орын) тұр.

Қазақстанның индексі 53,04 болды, бұл - орташа деңгей. 52,13 индексімен 48-орында Уругвай, 53,25 индексімен 46-орында Алжир тұр.

Беларусь және Қырғызстан сияқты ЕАЭО елдерінде де қылмыс орташа деңгейде, бірақ Қазақстанға қарағанда біршама нашар. Беларусь 57,18 индексімен 32-орында болса, Қырғызстан 55,88 индексімен 36-орында. Сонымен қатар, ЕАЭО-ға кіретін Ресей мен Арменияда қылмыс деңгейі төмен. Осылайша, Ресей 39,32 индексімен 94-орынға, ал Армения 27,75 индексімен 136-орынға жайғасқан. Көрші Өзбекстанда да қылмыс деңгейі төмен: 33,68 индексімен 104-орында.

Ең төменгі қылмыс деңгейі Катарда (14,15 индексімен 142-орын), БАӘ (14,87 индексімен 141-орын) және Тайваньда (16,15 индексімен 140-орын). Сондай-ақ, қылмыс деңгейі өте төмен рейтингте Мэн аралы (18,28 индексімен 139-орын) және Оман (19,72 индексімен 138-орын) бар.