Студенттің стипендиясы да кіріс санатына қосылмақ

Енді осы бір келелі бастаманың кейбір келеңсіздіктерін атап өтейік. Соңғы жаңалықтарының бірі - жалпы кіріс есебіне студенттердің шәкіртақысын қоса есептеуі. 

Осы бастамаға жауапты Еңбек және халықты әлеуметтік қорғау министрлігінің пайымына көз жіберсек, атаулы әлеуметтік көмек алатын отбасының кірісін есептеу барысында балаларға берілетін жәрдемақыға аса талапшыл болмаған абзал. Ал аталмыш министрліктің басшысы дүйсенбідегі үкімет отырысында қарама-қайшы пікір білдірді. 

"Шәкіртақы мен мүмкіндігі шектеулі балалардың жәрдемақысы туралы айтсақ... Бүгінде заңға сәйкес мүмкіндігі шектеулі балалардың мемлекеттен алатын жәрдемақысы кіріс ретінде есептелмейді. Сондықтан, жаңа жылдан кейін де бұл талапты өзгертуге мен түпкілікті қарсымын. Бұл - ерекше санат, біз оған тиіспейміз", - деді Біржан Нұрымбетов.

Ал көпбалалы және аз қамтылған отбасыдан шыққан студенттердің шәкіртақысын кіріс санатына қоспақ. Бұған министр мырза "бақандай" екі уәж айтады. 

"Басқа қалада білім алып жатқан студент те отбасы мүшесіне саналады. Демек, бұл адамға да отбасы бюджетінен қаражат бөлінеді. Осындай жағдайларды ескере отырып, шәкіртақыны кіріс санатына қосуды дұрыс деп есептеймін. Салық кодексінің 160-бабына сәйкес стипендия туралы айтылады және оны кіріс деп санайды. Егер біз студентті отбасы мүшесі ретінде қарасақ, оның шәкіртақысын да кіріс деп санауымыз керек. Дегенмен, талқылауға, ойлануға мақұлмыз", - деді министр. 

Мәжіліс депутаты Гүлжан Қарағұсова министрдің бұл сөзіне қарсы екенін мәлімдеді. Оның айтуынша, заңға сәйкес, үстіміздегі жылдың 1-қаңтарынан бастап шәкіртақы кіріс санатына жатпайды. 

 "Болашақ" бағдарламасымен оқып жатқандардың шәкіртақысы туралы сөз бөлек. Олардың жалақысы да, стипендиясы да қатар жүреді. Ол көлемді кіріс болуы мүмкін. Ал жоғары оқу орындары мен орта техникалық білім беру орындарындағы студенттердің стипендиясы - жастарды қанаттандыру үшін жұмсалып жатқан ақша. Үлгерімі нашарлар стипендия алмайды, сәйкесінше, жақсы оқитындар ерекше санаттағы шәкіртақы алады. Сонда жақсы оқып, өз ақшасымен өзім қамтамасыз етіп жүрген отбасы стипендиядан қағылған студенттің отбасымен салыстырғанда, АӘК ала алмай, ауыздарын қу шөппен сүрту керек пе? Мен мұнымен келіспеймін, кейбір ауыстыруды қажет етпейтін дүниелер бар", - деді депутат. 

Былтыр қараша айында депутаттар студент шәкіртақысын кіріс санатына қоспауды ұсынған. Министрлік өз кезегінде бұл ұсынысқа қолдау білдірген-ді. Нілдей бұзылған көңіл-ай...