06.08.2018, 17:54
Храпунов "вор в законе" ме?
Алматы қаласының қылмыстық істер жөніндегі мамандандырылған ауданаралық сотында Виктор Храпунов пен Лейла Храпуноваға және тағы он адамға қатысты сот отырысы басталды.
Сот Виктор мен Лейласыз өтіп жатыр. Бұлардан бөлек тағы бір күдікті Айяра Ілиясова да жоқ. Яков Заяц, Ғабиден Қайымсұлтанов, Қуандық Бискультанов, Абай Сапаров, Алтай Қасымов, Серік Есмұханов, Айнагүл Садықбаева, Абылайхан Қармысов және Абдул-Ғазиз Мұқашев ешқайда кетпеу жөнінде қолхат жазған.
Сонымен, Виктор Храпуновқа қандай айып тағылды?
"Жеке бас мүддесін күйттеген Виктор мен Лейла Храпуновтар қылмыстық топ құрып, оны басқарған. Қылмыстық топтың негізгі қызметі - бюджет қаржысын заңсыз жымқыру, мемлекет меншігіндегі жылжымайтын мүліктерді иелену, пара алу, аударылған қаржыны заңдастыру".
Сот процесі барысында Храпуновтарға тағылған айыптың бір парасы осы екенін білдік.
В.Храпунов Алматы қаласының әкімі кезінде лақап аты "полтиник" деп еститінбіз. Олай дейтіні, құжатқа қол қою үшін 50 мың доллардан кем пара алмайды-мыс. Қылмыс әлемінде "вор в законе" дейтін ұғым бар. Бұлар - қылмыс әлемінің серкелері. Енді осы ұғымды бұрынғы-соңғы мемлекеттік қызметшілерге қарай бұрып көрейікші. Храпуновты "вор в законе" деуге бола ма? Әлде ол көп ұрының бірі ғана ма?
Қош, Храпуновтардың өздері қатыспаса да, сот отырысы басталды. Күйеуінің түкірігі жерге түспей тұрғанда Лейла өзін президенттің үлкен қызы Дариға Назарбаеваның жақын құрбысы етіп көрсететін. Бекерден-бекер өйтпеген шығар. Ендеше, сотқа Дариға Нұрсұлтанқызын куәгер ретінде шақырса, әлдеқайда сенімді болар еді...
142
0