Чемпиондар Лигасы: «Бавария» мен «Барселона» - ширек финалдағы қарсыластар

Түн ауа УЕФА Чемпиондар Лигасының 1/8 финалындағы қорытынды матчтар өтті. Алғашқы матчта «Челсиды» 3:0 есебімен жеңген мюнхендік ұжым өз алаңында ағылшын командасын 4:1 есебімен тас-талқан етсе, бірінші кездесудегі тең нәтижеге қол жеткізген «Наполи» Камп Ноуда 3:1 есебімен ұтылды. 

Бавария – Челси (7:1)
Бундеслига чемпиондары өз дағдысынан жаңылмай, үйдегі кездесуде ірі есеппен жеңіске жетіп, Чемпиондар Лигасының ¼ финалына жолдама алды. Нойер қос кездесуде қақпасына бір ғана гол жіберсе, оның әріптестері жеті мәрте қарсылас қақпасына доп сүңгітті. 

Франк Лэмпард шәкірттері қанша тырысса да мюнхендік клубтың қорғанысынан саңылау таппады. Айта кету керек, «Челсидың» М.Алонсо, С.Аспиликуэта, Виллиан, Жоржиньо, Педро, Пулишич сияқты негізгі құрам ойыншылары матчқа қатыспады. Ал Лэмпард 90 минут ішінде бір ғана ойыншыны алмастырып, Жируға үміт артқан. Расында алаңдағы футболшыларды ауыстыра қоятын да ешкім жоқ еді. 

Ал «Бавария» шабуылшысы Роберт Левандовский екі ойында Кабайероны үш мәрте қапы қалдырды. Екінші кездесуде Перишич пен Толиссо да көзе түсті. Қорытынды есеп – 7:1. 
«Баварияның» ширек финалдағы қарсыласы – каталониялық «Барселона».
 
Барселона – Наполи (4:2)
Италиялық ұжым алғашқы матчта 1:1 есебіне қол жеткізіп, турнирді әрі қарай жалғастыруға мүдделі еді. Бірақ Камп Ноудағы бәсекеде Сетьен шәкірттері керемет ойын көрсетті. 
Кездесудің алғашқы он минутында «Барселона» қорғаушысы Ленгле бұрыштамадан көтерілген допты баспен соғып голға айналдырса, Месси жиырма үшінші минутта «Наполи» қорғаушыларын қапы қалдырып тамаша гол соқты. 

Үшінші голды он бір метрліктен мүлт кетпеген Суарес соққан. Алғашқы таймның соңғы минутындағы пенальтиден кейін дәл осындай мүмкіндікке Гаттузо шәкірттері ие болды. Инсинье Тер Штегеннен айласын асырды. Ойынның бірінші жартысынан кейін таблодағы есеп өзгермеді: 3:1. 

Допқа иелік етуден басымдық танытқан «Наполи» (53 пайыз) 17 соққы жасаса, оның үшеуі қарсылас қақпасына түзу бағытталыпты. Италиялық клуб каталониялық ұжымға қарымды қарсылық танытты. Бірақ... бірақ...
Чемпиондар Лигасының ¼ финалындағы «Барселона» мен «Бавария» кездесуі тамыз айының 15-не жоспарланған.