08 авг 08:43korilim:1 368 Sport

Чемпиондар Лигасы: Ширек финалға «Реал» мен «Ювентус» өте алмады

Кеше футбол жанкүйерлерін ұзақ күттірген Чемпиондар Лигасының 1/8 финалындағы қарымта матчтар ойналды. Бірінші ойында өз алаңында 2:1 есебімен жеңілген Мадридтік «Реал» Манчестер қаласына қонаққа барса, «Ювентус» «Лионды» қабылдады.

Манчестер Сити – Реал Мадрид (2:1)
Зидан баптайтын команданың жанкүйерлері ағылшын командасы аңыз клубтың жолында кедергі бола алмайтынына қатты сенді. Дегенмен Гвардиола шәкірттері бұл оймен келіспейтінін аңғартып, «Этихад» стадионында қарқынды ойын көрсетті.
Кездесудің тоғызыншы минутында қалалықтардың беткеұстары Рахим Стерлинг Куртуа қорғайтын қақпадан саңылау тауып, таблодағы нөлдіктерді өзгертіп үлгерген. Есеп – 1:0.

Матчтың жиырма сегізінші минутында алғашқы минуттан алаңға шыққан жас ойыншы Родриго қарсылас қақпасының маңындағы қарбаласта ебін тауып допты Бенземаға жеткізді. Француз ашық қалған қақпаға допты бағыттай салған. Есеп – 1:1.
Алғашқы тайм тең аяқталды. Үзілісте Зиданның шәкірттеріне көрсеткен тактикасы екінші таймда көмектесе қоймады. Оның үстіне 68-минутта қорғаушылардың қателігін мүлтіксіз пайдаланған бразилиялық Жезус өз командасын тағы алға шығарды. Есеп – 2:1.
Екі кездесуде алты гол салынды. Оның төртеуі – Гвардиола шәкірттерінің еншісі. Осылайша Зидан мен оның командасы кәрі құрлықтың клубтар арасындағы бас турнирімен ерте қоштасты. Қорытынды есеп – 4:2.

Ювентус – Лион (2:1)
Францияда жеңілген туриндік ұжым өз алаңында ортаңқол команданың тас-талқанын шығаруға еш күмәнданбағаны анық. Бірақ Гарсия өз шәкірттерін мықты жасақтапты.
Ойында төрешінің сұқ саусағы екі мәрте қақпа жақты нұсқады. Ойынның он екінші минутындағы пенальтиді Мемфис Депай голға айналдырса, тайм аяқталар тұста Роналду да он бір метрлік айып добын өз пайдасына шешті. Есеп – 1:1.

Матчтың екінші жартысында Криштиану Роналду Бернардерскийдің пасын голға айналдырып, команданы алға шығарған. Бірақ алпысыншы минутта салынған гол, өкінішке қарай, матчтағы соңғы гол екен.

Ойын өте тартысты өтті. Чемпиондар Лигасының жолдамасына ұмтылыс алаңда бәрін ұмыттырған сыңайлы. Тоғыз ойыншы бас қазы Цвайердің сары қағазымен жазаланды. Алаң жиегіндегі «Ювентустың» бас бапкері Сарри де сары қағаз дәмін татқан.
Осылайша 1/8 финалдағы қарымта матчтар тәмәм. «Лион» сырт алаңда салған голдың есебінен турнирді жалғастыруға мүмкіндік алды. Ширек финалда «Манчестер Сити» мен «Лион» өзара бақ сынаспақ.
Бүгін Чемпиондар Лигасының 1/8 финалының қарымта кездесулері «Барселона» мен «Наполи», «Бавария» мен «Челси» арасында өтеді.

Басып шығару