Тоқаев шенеуніктердің ақшаларын бақылау туралы заңға қол қойды

Қасым-Жомарт Тоқаев «Қазақстан Республикасының кейбір заңнамалық актілеріне қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл мәселелері бойынша өзгерістер мен толықтырулар енгізу туралы» заңға қол қойды.

Бұл заң ұлттық мемлекеттік шенеуніктердің және олардың отбасыларының қаржысы мен мүлкін бақылайды. Нақтырақ айтсақ, кімнің қаржысы мен өзге де мүлкі қадағаланатынын президент шешеді. Аталған тұлғалардың және олардың отбасы мүшелері мен жақын туыстарының тізімін қаржы мониторингі агенттігі жүргізетін болады.

Мемлекеттік қызметшілерге мемлекет және үкімет басшылары, жоғары лауазымды үкімет, сот және әскери қызметкерлер, мемлекеттік органдардың, квазимемлекеттік сектордың және саяси партиялардың басшылары жатады.

Бұған дейін сенатор Ольга Перепечина тізімге бірінші кезекте әкімшілік мемлекеттік қызметкерлер – облыс әкімдері, аудан, республикалық маңызы бар қала әкімдері кіруі мүмкін екенін айтқан еді.