Тоқаев коронавирус бойынша жаздағы жағдайдың қайталану қаупі жоғары екенін айтты
Мемлекет басшысы Қасым-Жомарт Тоқаев Қазақстанда 2020 жылдың жазында болған коронавирусқа қатысты жағдай қайталануы мүмкін екенін айтты.
Президент 17 наурызда Алматыны дамыту жөніндегі кеңесте елдегі тұрақсыз эпидемиологиялық ахуал туралы айтты. Сондай-ақ, Қазақстанмен көршілес елдерде коронавирус инфекциясының таралуы өршіп жатқанын ескертті.
«Қазір Алматы "қызыл" аймақта. Сондықтан бұл маңызды отырысты онлайн форматта өткізуге мәжбүрміз. Бұл жағдайдың ауырлығын көрсетеді. Қазірдің өзінде ауыр науқастар санының өсуі және реанимациялық төсек-орындардың толғаны байқалады.
Бұл ретте азаматтардың эпидемиологиялық сақтық шараларын ұстамай, халық пен кәсіпкерлер тарапынан босаңсу байқалады. Сондықтан жаздағы жағдайдың қайталану қаупі жоғары. Әрине, бәрі тек дәрігерлер мен денсаулық сақтау жүйесіне байланысты емес. Сондықтан мен тағы да отандастарымды ұстамдылықты жоғалтпауға, барлық сақтану шарасын ұстауға, коронавирусқа қарсы жаппай вакцинацияны қолдауға шақырамын», - деді Қасым-Жомарт Тоқаев.
Фото: holanews.kz