Қазақстан үкіметі қалай тағайындалады?

Министрлер кабинеті мәжілістің жаңа шақырылымы сайланған соң өкілеттігін тоқтатты. Енді премьер-министр президентке үкіметтің құрамы туралы ұсыныс енгізеді.

Конституцияның 65-бабында премьер-министр тағайындалғаннан кейін президентке он күн ішінде үкіметтің құрылымы мен құрамы туралы ұсыныстар енгізетіні көрсетілген. 

"Үкімет туралы" Конституциялық заңның 19-бабы бойынша премьер-министр Республика президентіне ұсыныс енгізеді: 

1. Үкіметтің құрылымы мен құрамы туралы; 
2. Сыртқы істер, қорғаныс, ішкі істер министрлерін қоспағанда, парламент мәжілісімен консультациялардан кейін үкімет мүшелерін қызметке тағайындау үшін кандидатуралар ұсынады. 

Төменгі палатаның регламентінде  (Парламент және оның депутаттарының мәртебесі туралы заңның 22-1-бабы) үкімет мүшелерін қызметке тағайындау үшін мемлекет басшысына ұсынылатын кандидатуралар бойынша мәжіліс пен оның тиісті тұрақты комитеттерінде консультациялар өткізілетіні көрсетілген. 

"Президент туралы" Конституциялық заңның 10-бабында сыртқы істер, қорғаныс, ішкі істер министрлерін қызметке президент тағайындайтыны көрсетілген.

Үкімет – Қазақстан Республикасының атқарушы билігі, атқарушы органдар жүйесін басқарады және олардың қызметіне басшылық етеді. Үкімет өзінің бүкіл қызметінде президент пен парламент алдында жауапты. 

Қазақстан Республикасының үкіметі: 

• мемлекеттің әлеуметтік-экономикалық саясатының, оның қорғаныс қабілетінің, қауіпсіздігінің, қоғамдық тәртіпті қамтамасыз етудің негізгі бағыттарын әзірлейді және олардың жүзеге асырылуын ұйымдастырады; 
• Парламентке республикалық бюджетті және оның атқарылуы туралы есепті ұсынады, бюджеттің атқарылуын қамтамасыз етеді; мәжіліске заң жобаларын енгізеді және заңдардың орындалуын қамтамасыз етеді; 
• мемлекеттік меншікті басқаруды ұйымдастырады; 
• республиканың сыртқы саясатын жүргізу жөнінде шаралар әзірлейді; 
• министрліктердің, мемлекеттік комитеттердің, өзге де орталық және жергілікті атқарушы органдардың қызметіне басшылық етеді; 
• министрліктер, мемлекеттік комитеттер, өзге де орталық және жергілікті атқарушы органдар актілерінің күшін толық немесе қолданылу бөлігінде жояды немесе тоқтата тұрады; 
• Республика президентімен келісім бойынша мемлекеттік бюджет есебінен қамтылатын барлық органдар үшін қаржыландырудың және қызметкерлердің еңбегіне ақы төлеудің бірыңғай жүйесін бекітеді; 
• өзіне Конституциямен, заңдармен және президент актілерімен жүктелген өзге де функцияларды орындайды.