Брифингтен бой тасалап, блогерлермен бас қосатын министр

Халықтың ілтифатына бөленген министр – Алексей Цой бір жарым айдан бері апта сайынғы брифингте бой көрсетпей жүр. Денсаулық сақтау министрінің орынына журналистер сауалына ведомстваның ресми өкілі Бағдат Қожахметов жауап беріп жүр. Министрдің «санаулы секундтары» бар екенін айтқан ресми өкілдің сөзіне сену қиын сияқты. Өйткені елдегі беделді платформа саналатын Kozachkov offside Телеграм арнасында Алексей Цойдың блогерлермен кездесіп жүргені туралы ақпарат жарық көрді. 

Телеграм арнаның иесі Бағдат Қожахметовті PR-мамандарынан медиаорталық құрды деп отыр. Ал Цойдың кездесулерінде қазақстандықтарды алаңдатып отырған пневмония, коронавирус, медициналық көмек алу сияқты тақырыптар жабық күйінде қалып отыр. Міне, осы себепті журналистер Цойдың баспасөз конференциясына шығуын талап етіп отыр. Ал Қожахметов министрдің «әр минуты санаулы екенін», 30-қыркүйекке дейін журналистерге, тіпті, онлайн да жауап бере алмайтынын алға тартып отыр. 
Бірақ мақтаған министріміз журналистерден алшақ жүрсе де, блогерлермен шай ішіп, арқа-жарқа отырыста болуға уақыт тауыпты. Тіпті, онлайн да емес, оффлайн кездесу. Бұл үшін блогерлер елордаға елпектемейді де. Белгілі блогер Бейбіт Әлібеков: «Бүгін министр Цой менің территориямда кездесуге келісті», - деп жазды. 

Ал блогердің территориясы – Алматыдағы Esentai City маңындағы кафе. Алексей Цоймен бірге депутат Қайрат Құдайберген, блогер Шолпан Али, Жанна Ильичева және 4 адам дастархандас болды. 
Бейбіт Әлібеков министрмен селфи жасап, көңіл-күйі жақсы екенін оқырмандарына жеткізсе, Қайрат Құдайберген Цойдан кәсіпкерлер жұмыс істеуі үшін карантинді жеңілдетуді сұрағанын айтыпты. 
Шолпан Али мен Жанна Ильичева министрді ұмытып, кафедегі тамақпен әуре болған сыңайлы. Жиналғандар Денсаулық сақтау саласының басшысын мүлде ұмыта жаздап барып, оның «жақсы, қарапайым, интеллигент, жағымды» адам екенін айтады. Ұмытып кетсе ұят болар еді. Өйткені министр Нұр-Сұлтандағы брифингте журналистер сауалына жауап беруге уақыт таппаса да, блогерлер шайы үшін Алматыға келді емес пе?

Цойды елордадағы қоғам белсенділері де қолдайды. Олардың қатарында Мұрат Әбенов, Ерлан Саиров, Ғалым Байтұқ бар. Бұл кісілер министрдің тәулігіне 3-4 сағат қана ұйықтайтынына дейін біледі екен. Ал Байтұқ бірер күн бұрын жиырмаға жуық адаммен ахуалды түзей алған Цой туралы мақтанышпен мәлімдеме жасады. 
Команда туралы айтқан соң келесі сөзге де кезек берейік. Цой министр лауазымына тағайындалған бойда орынбасары болып Ажар Ғинаят келді. Қазақстан президенті іс басқармасы медициналық орталығының жетекшісі кезінде де Ғинаят Цойдың орынбасары болған еді. Министрдің тағы бір орынбасары Людмила Бюрабекова да дәл осы орталықта бұрынырақ жұмыс істепті. 
Жақын күндері вице-министр және бас мемлекеттік санитарлық дәрігер болып аталмыш орталықта қызмет еткен Ерлан Қиясов тағайындалды. Бұл қандай процесс?!