«Түркі әлемі: тілдік ахуал, латын әліпбиі және әдістеме»

Қазақстан Республикасы Мәдениет және спорт министрлігі Тіл саясаты комитетінің тапсырысы бойынша Шайсұлтан Шаяхметов атындағы «Тіл-Қазына» ұлттық ғылыми-практикалық орталығы «Түркі әлемі: тілдік ахуал, латын әліпбиі  және әдістеме» тақырыбында онлайн режимде а.ж. 17 қыркүйекте халықаралық семинар-кеңес өткізді. 
Семинар-кеңестің мақсаты – түркі тілдерін зерттеушілермен,  әдіскерлерімен  ғылыми пікір, тәжірибе алмаса отырып, өзара туыстас тілдердің мамандары арасында халықаралық байланысты қалыптастыру. 
Осы халықаралық жиын барысында жаһандану жағдайындағы тілдік ахуал ортаға салынды, әліпби және түркі тілдерін оқыту әдістемесі бағытында ортақ және жеке ғылыми-әдістемелік дәстүрлер мен жаңашыл бастамалар жөнінде пікір алмасып, тәжірибелер қорытындыланды. 
Сонымен қатар түркі халықтары қолданатын әліпби нұсқалары, әліпби түзу принциптері, әр тілдің фонетикалық ерекшеліктері, емле ережелері жөнінде әңгіме қозғалды. Сондай-ақ осы ғылыми басқосуда ортақ түрік әліпбиі, оның қажеттілігі мен мүмкіндіктері жөнінде  мәселе көтерілді. 
Ісшара аясында Түркияның Башкент университетінің профессоры Суер Екер «Әліпби реформаларына лингвистикалық көзқарас», Мирзо Улугбек атындағы Өзбекстан ұлттық университетінің профессоры Н.А. Рахманов «Өзбекстанда латын графикасының қабылдануы және ондағы туындаған кейбір мәселелер»,                          Н.Ф. Катанов атындағы Хакас мемлекеттік университетінің филология ғылымдарының докторы Андрей Данилович Каксин «Түркі жазуын латын әліпбиіне көшіру жағдайы мен алғышарттары туралы» және т.б. ғалымдар  баяндама   жасады.
Халықаралық семинар-кеңестің басты қорытындысы түркі тілдері мамандарының осындай ғылыми басқосуларын дәстүрге айналдырып, өзекті тақырыптар төңірегінде өзара тәжірибе алмасуды жалғастыру болып отыр. 
Ісшараға ғағауыз, қырғыз, ноғай, өзбек, хакас, қарақалпақ, түрік, тыва, татар және қазақ тілдерінің мамандары, барлығы 5 елден (Түрік, Өзбекстан, Қырғызстан,  Молдова, Ресей)  ғалымдар қатысты.
Сонымен қатар ісшараға Қазақстан Республикасы Білім және ғылым министрлігі, Қазақстан халықтары Ассамблеясы жанындағы «Қоғамдық келісім» мекемесі, Түркі академиясының өкілдері, жоғары оқу орындарының ғалымдары,  республика бойынша тіл оқыту орталықтарының оқытушы-әдіскерлері қатысты.