Соғыс салқыны: Армения елшісі соғысқа дайындық туралы мәлімдеме жасады

Арменияның Мәскеудегі елшісі Вардан Тоганян Әзірбайжан билігінің халықты соғысқа дайындап жатқанын айтып, шұғыл мәлімдеме жасады. 
Еске салайық, өткен аптаның басында Әзірбайжан президенті Ильхам Алиев Қарабақ дауы туралы келіссөздердің жүргізілмей жатқанын, Сыртқы істер министрлерінің видеоконференциясы ешқандай маңызы жоқ дүние екенін айтқан. 
Армения мен Әзірбайжан арасында 12-шілдеде басталған қарулы қақтығыстар жалғасып жатыр. Жарылғыш заттар бейбіт тұрғындардың арасына да түсіп жатыр. Қазір шекараларда бекеттер қойылып, күзет күшейтілген. 
Баку жариялаған ақпаратқа сенсек, бір генерал және 11 әзірбайжандық әскер оққа ұшыпты. Армян жұртының басшылығы төрт әскериден айырылып, бірнеше адамның жарақат алғанын мәлімдеді. 
Бірқатар мемлекеттер мен халықаралық ұйымдар бұл жағдайға мән беріп, тараптарды ымыраға шақырды. Ал Ресей СІМ аймақтағы жағдайды реттеуде делдал болуға дайын екендерін алға тартып отыр.