Коронавируспен күрес: Қазақстандық компания Сербияға миллиондаған қаржы бөлген
Қазақстандық компания Сербияға коронавируспен күресу үшін үш миллион серб динары көлеміндегі қаржы бөлді. Бұл туралы ҚР Сербиядағы елшілігінің қызметкері Әлібек Қиманов мәлімдеген.
«Сербия президентінің үндеуіне құлақ түрген «ZGOP» компаниясы инфекциямен күрес үшін 3 миллион серб динарын (12,5 миллион теңге) бөлді. Құрылыс, теміржолды жөндеу сияқты қызмет көрсететін компания 2017 жылдан бері қазақстандық компания Integra Construction KZ меншігі болып саналады. Александр Вучич компанияларды елге көмектесуге үндеді, ал қазақстандық инвестор бұл іске өз үлесін қосты», - деп жазады Қиманов.
Елшілік мәліметі бойынша, бөлінген қаражат медициналық маскалар өндіруге және әлеуметтік топтарға берілмек.
«Бұл – бауырлас Сербия халқына қажет кезінде көмек беру. Достық парыз және міндет», - деп жазды Қазақстанның Сербиядағы елшісі Ғабит Сыздықбеков.
Қазақстандық компания бірнеше жылдар бойы Сербия нарығында жұмыс істеп, жақсы нәтижелер көрсетіп келеді.