Кері қайту
Басып шығару
Президент: Конституция бойынша орыс тілі ресми түрде қолданылады
Мемлекет басшысы Қасым-Жомарт Тоқаев «Комсомольская правда» газетіне берген сұхбатында славян тілдеріндегі жер-су атауларын қазақшалауға мән беретінін жеткізді.
«Газеттің арнайы тілшісі Дмитрий Стешин бір жыл бұрын Қазақстанды аралап, сіздің елдегі орыс азаматтармен тілдесті. Олардың көпшілігі елді-мекендердің аты жиі ауысатынын, славян халықтары өкілдерінің билік органдарында еңбек етуінде айтарлықтай қиындықтар бар екенін алға тартқан», - деп сауал жолдады басылым тілшісі.
«Жаппай жер-су аттарын өзгерту әлі басталмады. Бірқатар елді-мекендер, көшелер байырғы атауына қайта оралды. «Тепловозная, «Приканальная» сияқты кеңестік дәуірді сипаттайтын, сүйкімсіз естілетін атаулар өткенде қалды», - деді Тоқаев.
Президент әрбір атауды ауыстыру кезінде түсіндіру жұмыстары жүргізілетінін, тарихи зерттеулер болатынын, азаматтардың пікіріне құлақ асылатынын айтты. «Билік орысша атауларды алып тастауды мақсат етпейді. Мысалы, жақында ғана Қарағандыда Потанин мен Затаевичтің атына көше берілді. Ал орыстардың мемлекеттік қызметке келуінде қиындық бар дегенмен келісе алмаймын. Славян халықтарының және басқа этнос өкілдері парламентте, мәжілісте, тағы басқа билік органдарында жұмыс істейді. Орыстар орта және шағын бизнестің, өндірістің, ауыл шаруашылығының дамуына үлкен үлес қосып келеді. Конституция бойынша орыс тілі мемлекеттік органдарда ресми түрде қолданылады», - деді ол.