Жаңа жәрдемақыны кімдер алады?

Екі апта ішінде көпбалалы аналарға мемлекет тарапынан тағайындалған жаңа жәрдемақыны алуға 25 мың ана өтініш білдірген. 

25 мың ананың 11,8 мыңы жәрдемақыға алғаш рет өтініш білдірсе, 13,7 мыңы қайта есептеуді сұраған. Өтініштің көп бөлігі Түркістан, Алматы облыстарында және Шымкент қаласында берілген. 

Айта кетелік, Халыққа қызмет көрсету орталықтары жәрдемақының осы түріне өтінішті қараша айынан бастап қабылдауда. 2020 жылдың 1-қаңтарында аталмыш көмекті алатын отбасылар саны 368,9 мыңды құраған. Бұл жердегі 246 мыңнан көп отбасы 2020 жылға дейін де көпбалалы отбасы ретінде жәрдемақы алып келген. Оларға жаңа жәрдемақы ешқандай құжат дайындаусыз, автоматты түрде тағайындалды. 

Бұл жәрдемақы отбасымен бірге тұратын төрт немесе одан да көп баласы бар отбасыларға беріледі. Егер бала кәмелет жасқа толып, жоғары оқу орынында оқып жатса, онда жәрдемақы 23 жасқа дейін төлене береді. 

Жәрдемақы алу үшін отбасының кірістерінің көлемі маңызды емес. Төрт баласы бар отбасыларға – 42 496 теңге, бес баласы барларға – 53 127 теңге, алты балаға – 63 757 теңге және жеті не одан да көп баласы бар отбасыларға 74 388 теңге тағайындалған.