Ағылшын жазушысының Қазақстан туралы кітабы
Британдық балалар жазушысы Луиза Пулдың «Жарық жұлдыз» атты кітабы кішкентай қыз бен понидың жақын әрі шынайы достығын сөз етеді.
Автордың айтуынша, ол кішкентай қызымен Шропширге барғаннан кейін осы кітапты жазу туралы шабыт алады. Қызы кең далада емін-еркін жайылып жүрген жылқыларға қызығып, шешесінен олардың шығу тегін сұрайды. Жазушы ретінде қызының бұл сұрақтарына жауап бергісі келген ол үйіне қайтқан соң, Ботай мәдениетін зерттеуге кіріседі. Зерттеу нәтижесі оған жылқыны ең алғаш қолға үйреткендер қазақ халқы екенін, сонымен бірге, қыл құйрықтылардың тарихи отаны Қазақстан болғанын дәлелдеп береді.
Луиза Пул бұл туралы:
– Бұл оқиға мені қатты қызықтырды әрі бейжай қалдырмады, сол үшін зерттеуімді тоқтатпай, әрі қарай жалғастыра бердім, ақырында мен Қазақстан туралы қолға үйретілген жылқылар жөнінде, олардың қайдан шыққанын, қалай өзгеріске ұшырағанын біле бастадым. Мен Қазақстанның табиғатына, халқына ой жүгіртуден танбадым, – деген көзқарасын айтады.
«Жарық жұлдыздың» кейіпкерлері 12 жасар Раушан мен Жарық жұлдыз атты пони. Жазушы шынайы да адал достық хикаясы баяндалған бұл шығарма жасөспірімдерге, анығын айтқанда, жеті мен он бір жас аралығындағы балаларды қызықтырады деген ойын алға тартады.
Сонымен қатар бұл кітап ересектерді де қызықтыра алатынына сенімді. Кітап авторы Луизаның мамандығы суретші, сондықтан кітаптың барлық иллюстрацияларын өзі жасапты.
– Мен бұл кітаптың жарыққа шығуына көмектестім, сонымен қатар оның туындысының көркем үлгіде оқырмандардың қолына жетуіне, шығармашылық белсенділігіне қолдау көрсеттім, – дейді кәсіпкер Стив Пул.
Ал жылқының шығу төркіні туралы балаларға арналған кітап жазған жазушы:
– Мен Қазақстанға барып көрген жоқпын, бірақ болашақта барсам деймін, ол жақтағы мәдени, тарихи орындарды, адамдардың тіршілігін, алма бауларын және ежелгі адамдардың тастарға салған суреттерін көрсем деймін, – деген жоспарымен бөлісті.
Қазірше аталған кітап тек қатты мұқаба түрінде басылып шыққан. Бірақ жақында жазушы осы туындының электронды нұсқасының да оқырмандармен бөліспек. Ал кейіпкерлер Раушан мен Жарқын жұлдыздың шытырман оқиғаларын да автор кітапқа кірістіруді жоспарлап жүргенін жасырмайды.
Дереккөз: «Егемен Қазақстан»